काठमाडौं, ६ असोज । मधेश प्रदेशमा सञ्चालित पूर्वाधार, ऊर्जा, जलस्रोत तथा सिँचाइसम्बन्धी आयोजना अनुगमन गर्न प्रतिनिधिसभाको पूर्वाधार विकास समितिअन्तर्गत प्रदेश उपसमिति गठन गरिएको छ।
उपसमितिमा सांसद तपेश्वर यादव, डा. मो. फिरदोश आलम, यशोदा कुमारी, राजकिशोर महतो कोइरी र रामाकान्त प्रसाद चौरसिया सदस्य छन्।
उपसमितिले प्रदेशका विभिन्न आयोजना तथा सरकारी निकायको काम, व्यवस्थापन र कार्यसम्पादनको अध्ययन तथा मूल्यांकन गर्नेछ। सार्वजनिक सम्पत्तिको हिनामिना, कानुन तथा सम्झौताअनुसार काम भए–नभएकोसमेत जाँच गरिनेछ।
आयोजनाको स्थलगत अनुगमन, कागजात अध्ययन र सरोकारवालासँग छलफल गरी आवश्यक सिफारिससहित समितिलाई प्रतिवेदन बुझाइनेछ। उपसमितिको कार्यावधि २०८३ माघ मसान्तसम्म तोकिएको छ।
