काठमाडौं, २९ भदौ । नेपाली कांग्रेसभित्रको आन्तरिक विवाद थप गहिरिएको छ। पूर्वसभापति शेरबहादुर देउवा पक्षले गगन थापा नेतृत्वको संस्थापन पक्षले विशेष महाधिवेशनपछि गरेका निर्णयहरू अस्वीकार गर्ने निर्णय गरेको छ।
सोमबार चुनदेवीमा बसेको देउवा समूहको बैठकले गत पुसमा भएको विशेष महाधिवेशन तथा त्यसपछि गठन भएका समितिका निर्णयलाई मान्यता नदिने निष्कर्ष निकालेको हो। साथै, असोजमा तोकिएको महाधिवेशन बहिष्कार गर्दै आफ्नै योजनाअनुसार मंसिरमा १५औँ महाधिवेशन गर्ने जनाएको छ।
देउवा पक्षले असोज १५ गतेदेखि तल्लो तहका अधिवेशन सुरु गर्ने निर्णय गर्दै निर्वाचन समिति गठन तथा अनुशासन र क्रियाशील सदस्यता समितिलाई पूर्णता दिने तयारी गरेको छ।
पार्टी आधिकारिकतासम्बन्धी मुद्दा सर्वोच्च अदालतमा विचाराधीन रहेकाले फैसला नआएसम्म आफ्ना गतिविधि जारी राख्ने उसको भनाइ छ।
