महोत्तरी, २७ भदौँ । दुई दिनदेखि बेपत्ता रहेका महोत्तरीका एक युवकको शव घरपछाडिको सेफ्टी ट्याङ्कीमा फेला परेको छ ।
बलवा नगरपालिका -७ बनौटास्थित एक घरको सेफ्टी ट्याङ्कीबाट टुक्रा टुक्रा पारिएको अवस्थामा विवेक कुमार सरदारको शव बरामद भएको प्रहरीले जनाएको छ ।
भङ्गाहा नगरपालिका–६ निवासी अशोक कुमार वातरका २२ वर्षीय छोरा विवेक भदौ १४ गते साँझ जलेश्वर नगरपालिका-९ पिगौनस्थित दिदीको घरबाट मोटरसाइकलमा घरतर्फ फर्किने क्रममा बेपत्ता भएका थिए । विवेक घर नफर्किएपछि उनका बुबाले भदौ १६ गते जिल्ला प्रहरी कार्यालय महोत्तरीमा हुलियासहित खोजतलासका लागि निवेदन दिएका थिए ।
निवेदनपछि प्रहरीले खोजी तीव्र बनाउने क्रममा बलवा-७ बनौटास्थित अशोक कुमार ठाकुरको घरपछाडि रहेको सेफ्टी ट्याङ्कीमा शव फेला पारेको हो ।
घटनाको अनुसन्धानका क्रममा प्रहरीले घरधनी ५८ वर्षीय अशोक कुमार ठाकुर, उनकी ५५ वर्षीया श्रीमती रामकली देवी र २२ वर्षीया बुहारी सोनु कुमारी ठाकुरलाई नियन्त्रणमा लिएको छ ।
त्यस्तै, महोत्तरी गाउँपालिका-५ का ३७ वर्षीय सियाराम शर्मालाई समेत प्रहरीले पक्राउ गरेको छ । पक्राउ परेकाहरूमाथि थप अनुसन्धान भइरहेको जिल्ला प्रहरी कार्यालय महोत्तरीले जनाएको छ ।
