काठमाडौं, २६ भदौ। सप्तरीको गजेन्द्र नारायण सिंह अस्पतालले प्रसूति सेवाका लागि भर्ना हुन नसकेपछि सडक पेटीमै बच्चा जन्माउन बाध्य भएकी बबिता पासवानको घटनापछि ६ जना कर्मचारीलाई कामबाट हटाएको छ।
अस्पतालले शुक्रबार सूचना जारी गर्दै डा. उषा देव, सुरक्षा गार्ड देवकान्त झा, स्टाफ नर्स मनिषा कुमारी साह र सजन चौधरी, कास रेणु ठाकुर तथा स्वीपर कृष्ण मेहतरलाई छानबिन समितिको प्रतिवेदन नआएसम्म कामबाट हटाइएको जनाएको छ।
राजविराज-१४ पर्साहीकी बबिता पासवानले गत मंगलबार अस्पतालले भर्ना नलिएपछि सडक पेटीमै बच्चा जन्माएकी थिइन्।
घटना सार्वजनिक भएपछि व्यापक आलोचना भएको थियो। सरकारले घटनाबारे छानबिन गर्न समिति गठन गरिसकेको छ।
