काठमाडौं, २५ भदौ । राजविराजस्थित गजेन्द्रनारायण सिंह सगरमाथा अस्पताल परिसर बाहिर महिलाले बच्चा जन्माएको घटनाप्रति स्वास्थ्य तथा खाद्य स्वच्छता मन्त्रालयले गम्भीर ध्यानाकर्षण जनाएको छ।
घटनाको सत्यतथ्य छानबिन गर्न नेपाल मेडिकल काउन्सिलका रजिष्ट्रार डा. सुप्रभात श्रेष्ठसहित पाँच सदस्यीय टोली राजविराज जाने भएको छ। मन्त्रालयका उपचारात्मक सेवा महाशाखा प्रमुख डा. पवनजंग रायमाझी पनि टोलीसँगै जानेछन्।
मन्त्रालयले अस्पतालसँग घटनाबारे स्पष्टीकरण माग्नुका साथै स्थलगत छानबिनपछि दोषी देखिए कानुनअनुसार कारबाही गर्ने जनाएको छ। अस्पतालले पनि छुट्टै छानबिन समिति गठन गर्ने भएको छ।
स्वास्थ्य संस्थामा आउने कुनै पनि सेवाग्राहीलाई उपचारबाट वञ्चित गर्न नहुने भन्दै मन्त्रालयले घटनालाई गम्भीरतापूर्वक लिएको जनाएको छ।
