काठमाडौं, २० भदौ । दक्षिण कोरियाका विदेशमन्त्री चो ह्युन शनिबार साँझ चार्टर्ड विमानमार्फत काठमाडौँ आइपुगेका छन्।
भोटेकोशी बाढीमा बेपत्ता भएका कोरियाली नागरिकको खोज तथा उद्धारबारे जानकारी लिन उनी तीनदिने नेपाल भ्रमणमा आएका हुन्।
बाढीपछि माथिल्लो त्रिशूली–१ जलविद्युत् आयोजनामा कार्यरत नौ जना कोरियाली नागरिक सम्पर्कविहीन छन्। उनीहरूमध्ये छ जना दोसान इनर्जीबिलिटी र तीन जना कोरिया साउथ–इस्ट पावरका कर्मचारी रहेको जनाइएको छ।
भ्रमणका क्रममा मन्त्री ह्युनले परराष्ट्रमन्त्री शिशिर खनालसँग भेट गरी बाढीपछिको खोज, उद्धार र राहतबारे छलफल गर्नेछन्। उनले नेपालमा खटिएको कोरिया डिजास्टर रिलिफ टिम (केडीआरटी) तथा बेपत्ता नागरिकको खोजीमा परिचालित कम्पनीका प्रतिनिधिसँग पनि भेट गर्ने कार्यक्रम छ।
केडीआरटीले नेपाली सुरक्षाकर्मी तथा उद्धार टोलीसँग सहकार्य गर्दै हेलिकोप्टर, ड्रोन, खोजी कुकुर र थर्मल इमेजिङलगायत उपकरण प्रयोग गरेर बेपत्ताको खोजी गरिरहेको छ।
