काठमाडौं,१४ भदौ । चीन सरकारले नेपालका बाढीपीडितका लागि घोषणा गरेको करिब २० लाख अमेरिकी डलर बराबरको आर्थिक सहयोग हस्तान्तरण गरेको छ ।
आइतबार अर्थ मन्त्रालयमा नेपालका लागि चिनियाँ राजदूत झाङ माओमिङले अर्थमन्त्री डा. स्वर्णिम वाग्लेलाई करिब १७ करोड रुपैयाँ बराबरको सहयोग रकमको चेक हस्तान्तरण गरे ।
साथै, चिनियाँ रेडक्रसले उपलब्ध गराएको करिब २ लाख अमेरिकी डलर बराबरको नगद सहयोग पनि प्रदान गरिएको छ । राजदूत माओमिङले विपद्को समयमा चीन नेपालसँगै रहेको बताउँदै थप राहत तथा उद्धार सहयोग निरन्तर रहने जानकारी दिए ।
उनका अनुसार चीनले टेन्ट, ब्ल्याङ्केट, स्लिपिङ ब्याग, मेडिकल किट र बिस्कुटलगायत ५० टन राहत सामग्री नेपाल पठाइसकेको छ । सुरुङमा फसेकाको उद्धारका लागि चिनियाँ हेलिकप्टरसहित दक्ष जनशक्ति नेपाल आइसकेको छ भने थप उद्धार प्राविधिक पनि परिचालन गरिएको छ ।
उद्धारका लागि आवश्यक ठूलो क्षमताका ड्रोन नेपाल पठाउन चीनले तीव्र तयारी गरिरहेको राजदूत माओमिङले जानकारी दिए ।
