सिमरा, ६ भदौ । । तीन वर्षीया गरिमा चौधरीको हत्या विरोधमा बाराको पथलैया चोकमा स्थानीयको प्रदर्शन जारी छ। गत बुधबारदेखि भइरहेको प्रदर्शनका कारण पूर्व–पश्चिम महेन्द्र राजमार्ग प्रभावित बनेको छ।
सडक खुलाउने क्रममा प्रहरी र प्रदर्शनकारीबीच विवादसमेत भएको छ। इलाका प्रहरी कार्यालय सिमराका डीएसपी दयाकृष्ण भट्टले पथलैयाको आन्दोलन सिमरामा केन्द्रित गर्न स्थानीयलाई आग्रह गरेका छन्।
यसैबीच, प्रदर्शनकारीले सिमरामा टेन्ट राखेर सडक धर्ना दिइरहेका छन्। बिहीबार राति स्थानीय प्रशासन, राजनीतिक दल तथा जनप्रतिनिधिको उपस्थितिमा पाँचबुँदे सहमति भए पनि मृतक बालिकाका परिवारले त्यसलाई अस्वीकार गर्दै आन्दोलन जारी राखेका छन्।
परिवारले न्यायको माग पूरा नभएसम्म आन्दोलन नरोकिने बताएका छन्। गरिमाको शव अझै कलैया अस्पतालमा रहेको छ।
