काठमाडौँ , ६ भदौ । बारामा बलात्कारपछि हत्या गरिएकी तीन वर्षीया बालिका गरिमा चौधरीलाई न्याय दिलाउन माग गर्दै शनिबार काठमाडौँको शान्तिवाटिकामा प्रदर्शन गरिएको छ।
प्रदर्शनमा सहभागीहरूले गरिमाको हत्या घटनाका दोषीलाई कडा कारबाही गर्नुपर्ने माग गर्दै विभिन्न नारासहितका प्लेकार्ड बोकेर प्रदर्शन गरेका थिए। उनीहरूले बालिकामाथि भएको जघन्य अपराधको निष्पक्ष अनुसन्धान गरी दोषीलाई कानुनी दायरामा ल्याउन सरकारसँग माग गरे।
प्रदर्शनकारीहरूले घटनालाई गम्भीर रूपमा लिएर तत्काल आवश्यक कानुनी प्रक्रिया अघि बढाउनुपर्ने बताएका छन्। उनीहरूले गृहमन्त्री र कानुनमन्त्रीले घटनाबारे तत्काल सम्बोधन गर्दै पीडित परिवारलाई न्यायको सुनिश्चितता गर्नुपर्ने मागसमेत गरेका छन्।
गरिमा चौधरीको बलात्कारपछि हत्या भएको घटनाले पछिल्लो समय व्यापक चासो र आक्रोश उत्पन्न गरेको छ। प्रदर्शनकारीहरूले यस्ता जघन्य अपराध दोहोरिन नदिन कडा कानुन तथा प्रभावकारी कार्यान्वयन आवश्यक रहेकोमा जोड दिएका छन्।
