काठमाडौं, ६ भदौ। गृहमन्त्री सुदन गुरुङले तीन वर्षीया गरिमा चौधरीमाथि भएको जघन्य अपराधप्रति दुःख व्यक्त गर्दै सरकारको पहिलो प्राथमिकता दोषीलाई कानुनी दायरामा ल्याएर पीडित परिवारलाई न्याय दिलाउनु रहेको बताएका छन्।
सामाजिक सञ्जालमार्फत उनले घटनाको आरोपित पक्राउ परिसकेको र अनुसन्धान जारी रहेको जानकारी दिँदै अनुसन्धानमा प्रहरीबाट लापरबाही भएको देखिए सम्बन्धित अधिकारीमाथि समेत छानबिन तथा कारबाही हुने बताए।
मृत्युदण्डको मागप्रति आफूले जनआक्रोश बुझ्ने भए पनि नेपालको संविधानले मृत्युदण्डसम्बन्धी कानुन बनाउन निषेध गरेको उनले स्पष्ट पारे। आवश्यक कानुन संशोधनको प्रक्रिया अघि बढिरहेको भन्दै उनले तत्कालको प्राथमिकता प्रमाण सुरक्षित गर्ने, निष्पक्ष र वैज्ञानिक अनुसन्धान गर्ने तथा दोषी उम्किन नदिने रहेको बताए।
गरिमाका अभिभावकले दिएको जाहेरीका आधारमा थप चार जना पक्राउ परेको जानकारी दिँदै मन्त्री गुरुङले अपुष्ट सूचनाका आधारमा मिडिया ट्रायल नगर्न आग्रह गरेका छन्। आक्रोशले अनुसन्धान र न्यायिक प्रक्रियालाई प्रभावित पार्दा अन्ततः न्याय नै कमजोर हुने उनको भनाइ छ।
