जनकपुर, ६ भदौ । जनकपुर उपमहानगरपालिकाभित्र गुठीअन्तर्गतका पोखरी तथा पोखरीका डिलमा भएको अतिक्रमण हटाउन डोजर चलाउन थालिएको छ ।
उच्चस्तरीय कार्यदलको प्रतिवेदन–२०६२ कार्यान्वयन समितिले सात दिनभित्र स्वेच्छाले संरचना हटाउन दिएको समयसीमा सकिएपछि शनिबार गोडधोई पोखरीबाट अतिक्रमित घरटहरा हटाउन सुरु गरेको हो ।
समितिका अनुसार पहिलो चरणमा विशहरा पोखरी, दशरथ तलाउ, अर्गजा सर, रत्न सागर, मुरली सर र दीर्घिका सरलगायतका पोखरी तथा डिलमा रहेका अनधिकृत संरचना हटाइनेछ ।
हालसम्म १३ वटा पोखरीको नापजाँच तथा रेखाङ्कन सम्पन्न भएको र तीमध्ये ७ पोखरीका डिलमा रहेका ४२ वटा कच्ची तथा पक्की संरचना हटाउने प्रक्रिया अघि बढाइएको छ ।
समितिलाई जनकपुर क्षेत्रका पोखरी, मठ–मन्दिर तथा गुठी जग्गाको अतिक्रमण हटाई संरक्षण र व्यवस्थापन गर्ने जिम्मेवारी दिइएको छ ।
