काठमाडौं, ५ भदौ। बाराको जीतपुरसिमरा–१ की तीन वर्षीया गरिमा चौधरीको बलात्कारपछि हत्या भएको भन्दै काठमाडौंमा विरोध प्रदर्शन भएको छ।
अधिकारकर्मी र आफन्तले गरेको प्रदर्शनमा सहभागीले ‘गरिमालाई न्याय दे’ लेखिएका प्लेकार्ड प्रदर्शन गरेका थिए। गरिमाका परिवारले पनि बारामा न्यायको माग गर्दै सडकमा धर्ना दिँदै आएका छन्।
परिवारको धर्नाका कारण वीरगञ्ज–पथलैया सडकखण्ड तेस्रो दिन पनि अवरुद्ध छ। प्रशासनले स्थानीयसँग गरेको सहमति परिवारको अनुमति बिना भएको भन्दै मृतकका बाबु मनोज चौधरीले अस्वीकार गरेका छन्।
उनले गृहमन्त्री सुधन गुरुङ र कानुनमन्त्री सोबिता गौतम घटनास्थलमा आएर कानुन संशोधनको प्रतिबद्धता जनाउनुपर्ने माग गरेका छन् ।
