जनकपुर, ३० साउन । मिथिलाञ्चलका नवविवाहिता महिलाले मनाउने मधुश्रावणी पर्व आज विधिपूर्वक समापन हुँदैछ ।
साउन कृष्ण पञ्चमी अर्थात् मौनापञ्चमीका दिन सुरु भएको पर्व साउन शुक्ल तृतीयाका दिन समापन गर्ने मैथिल परम्परा छ । पति-पत्नीबीच प्रेम, दाम्पत्य सुख र दीर्घ सौभाग्यको कामना गर्दै नवविवाहिता महिलाले माइतीघरमा यो पर्व मनाउने गर्छन् ।
पर्वमा शिव, गौरी र विषहराको पूजा, कथा श्रवण, सामूहिक गीतगान तथा ‘फूललोढी’ प्रमुख विधि हुन् । परम्परागत रूपमा ‘टेमी’ विधिअन्तर्गत घुँडामा बत्तीको लप्काले डाम्ने चलन रहे पनि पछिल्लो समय नयाँ पुस्ताले त्यसको सट्टा चन्दनको लेप लगाउन थालेका छन्।
पर्व समापनसँगै पूजामा प्रयोग गरिएका फूल तथा बेलपत्र नदी वा पोखरीमा विसर्जन गर्ने गरिन्छ । पहिले केही जातीय समुदायमा सीमित मधुश्रावणी पछिल्लो समय मिथिलाको साझा सांस्कृतिक पर्वका रूपमा विस्तार हुँदै गएको संस्कृतिविद्हरू बताउँछन् ।
