काठमाडौं, २६ साउन । सुनसरीको देवानगञ्ज घटनाका पीडितलाई न्याय, हिन्दु हितको संरक्षण र सुरक्षा व्यवस्थालगायतका माग राख्दै आमरण अनशनमा बसेका राष्ट्रिय एकता दलका अध्यक्ष विनय यादवले सरकारसँग चारबुँदे लिखित सहमति भएपछि अनशन स्थगित गरेका छन् ।
यादव साउन १४ गतेदेखि काठमाडौंको माइतीघर मण्डलामा आमरण अनशनमा बसेका थिए । मंगलबार सरकारसँग भएको सहमतिपछि तत्कालका लागि अनशन स्थगित गरिएको राष्ट्रिय एकता दलले जनाएको छ ।
दलले सरकारको प्रतिबद्धताअनुसार सुनसरी घटनाका पीडित तथा प्रभावित परिवारका माग शीघ्र सम्बोधन हुने विश्वास व्यक्त गरेको छ । साथै हिन्दु धर्म, संस्कृति र पहिचानको संरक्षणका लागि आवश्यक परे आगामी दिनमा आन्दोलन जारी राख्ने जनाएको छ ।
यादवले कुमारी कन्याको हातबाट जुस पिएर अनशन तोडेका हुन् ।
