जनकपुर, २६ साउन । धनुषाको मिथिला नगरपालिका–२ नक्टाझिजस्थित श्री जनता माध्यमिक विद्यालय विभिन्न शैक्षिक तथा भौतिक समस्याबाट गुज्रिरहेको छ ।
विद्यालयमा आवश्यक संख्यामा शिक्षक नहुँदा पठनपाठन प्रभावित हुनुका साथै विज्ञान प्रयोगशाला र खानेपानीको समेत समस्या रहेको विद्यालयले जनाएको छ ।
विद्यालयमा विज्ञान विषयको प्रयोगात्मक अध्ययनका लागि आवश्यक सामग्री उपलब्ध भए पनि त्यसलाई व्यवस्थित रूपमा प्रयोग गर्ने प्रयोगशाला भवनको अभाव रहेको बताइएको छ ।
प्रयोगशाला सञ्चालनका लागि आवश्यक सामग्री तथा उपकरणहरू अहिले दराजमै थन्काएर राख्नुपर्ने अवस्था रहेको विद्यालयका प्राध्यापक श्याम यादवले बताए । ‘ल्याबको भवन नै छैन, सामान दराजमा राखेका छौँ,’ प्राध्यापक यादवले भने ।
प्रयोगशालाका सामग्री प्रयोग गर्न नसक्दा विद्यार्थीहरू प्रयोगात्मक शिक्षाबाट वञ्चित भइरहेको उनको भनाइ छ । त्यसैगरी, विद्यालयमा आवश्यक शिक्षकको अभावसमेत रहेको बताइएको छ ।
पर्याप्त शिक्षक नहुँदा विद्यार्थीको नियमित पठनपाठन तथा विषयगत शिक्षण प्रभावित भइरहेको विद्यालय पक्षको गुनासो छ । विद्यालयमा स्वच्छ तथा पर्याप्त खानेपानीको समेत उचित व्यवस्था नभएको बताइएको छ ।
लामो समयदेखि देखिएका शिक्षक, प्रयोगशाला र खानेपानीसम्बन्धी समस्याले विद्यार्थीको शैक्षिक वातावरणमा असर पार्न सक्ने भन्दै विद्यालय व्यवस्थापन तथा स्थानीय तहको ध्यानाकर्षण आवश्यक देखिएको छ ।
विद्यालयमा उपलब्ध विज्ञान प्रयोगशालाका सामग्रीलाई प्रयोगमा ल्याउन आवश्यक पूर्वाधार निर्माण, पर्याप्त शिक्षकको व्यवस्था र विद्यार्थीका लागि गुणस्तरीय खानेपानी उपलब्ध गराउन सम्बन्धित निकायले तत्काल पहल गर्नुपर्ने देखिन्छ ।
