काठमाडौँ, २५ साउन । राष्ट्रिय प्रजातन्त्र पार्टी -राप्रपा)ले कप्तानगञ्ज र गोलबजारमा भएका पछिल्ला घटनाप्रति चिन्ता व्यक्त गर्दै नागरिकको जिउधनको सुरक्षा गर्न नसक्नु राज्यको कमजोरी भएको बताएको छ ।
प्रतिनिधिसभाको सोमबारको बैठकमा राप्रपा सांसद सरस्वती लामाले धार्मिक वा अन्य कुनै बहानामा हुने हिंसा रोक्न सरकारलाई सुरक्षा समन्वय र दीर्घकालीन उपाय अपनाउन आग्रह गरिन् ।
उनले नेपालको बहुधार्मिक तथा बहुसांस्कृतिक पहिचान संरक्षण गर्दै सबै धार्मिक संस्थालाई सरकारी निकायमा अनिवार्य दर्ता, आर्थिक स्रोतमा पारदर्शिता र नियमित लेखापरीक्षणको व्यवस्था गर्नुपर्ने बताइन् ।
लामाले धार्मिक केन्द्रहरूको स्थान तथा दूरीसम्बन्धी स्पष्ट मापदण्ड बनाएर सम्भावित द्वन्द्व न्यूनीकरण गर्नुपर्नेमा जोड दिइन् । उनले धर्ममाथि हस्तक्षेप नभई सुशासन, पारदर्शिता र सामाजिक सद्भावका लागि समान कानुनी मापदण्ड लागू गर्नुपर्ने बताइन् ।
