काठमाडौं, २४ साउन । राष्ट्रिय स्वतन्त्र पार्टी -रास्वपा)ले आगामी भदौदेखि ‘नागरिक, नीति र नेतृत्व’ कार्यक्रम सञ्चालन गर्ने भएको छ ।
जनउत्तरदायी, पारदर्शी र परिणाममुखी राजनीतिक संस्कार विकास गर्ने उद्देश्यले कार्यक्रम ल्याउन लागिएको रास्वपाले जनाएको छ । कार्यक्रमअन्तर्गत सरकारमा रहेका रास्वपाका मन्त्रीहरू महिनामा कम्तीमा एकपटक पार्टी केन्द्रीय कार्यालयमा उपस्थित भई नागरिकसँग प्रत्यक्ष संवाद गर्नेछन् ।
पहिलो चरणमा साँझ ५ देखि ६ बजेसम्म नागरिकले मन्त्रीसमक्ष आफ्ना समस्या, गुनासा र सुझाव राख्न सक्नेछन् । दोस्रो चरणमा मन्त्री, केन्द्रीय समिति सदस्य र प्रतिनिधिसभा सदस्यबीच बैठक गरी नागरिकबाट प्राप्त सुझाव तथा समसामयिक र नीतिगत विषयमा छलफल गरिनेछ ।
रास्वपाले यसबाट नागरिक, पार्टी, संसदीय दल र सरकारबीच समन्वय बढाउँदै नीति निर्माणमा नागरिकका मुद्दा समेट्ने लक्ष्य राखेको जनाएको छ ।
