काठमाडौं, २३ साउन । पूर्वप्रधानमन्त्री एवं नेपाली कांग्रेसका पूर्वसभापति शेरबहादुर देउवा उपचारका लागि करिब पाँच महिनादेखि विदेशमा रहेपछि बिहीबार नेपाल फर्किने भएका छन् ।
हङकङबाट शुक्रबार थाइल्यान्डको बैंकक पुगेका देउवा थाइ एयरको विमानमार्फत साउन २८ गते बिहीबार दिउँसो काठमाडौं आउने कार्यक्रम तय भएको देउवा निकट नेताहरूले बताएका छन् ।
यसअघि उनी साउन २६ गते नै नेपाल फर्किने भनिए पनि बैंकक गएपछि फर्किने मिति दुई दिन सरेको हो । कांग्रेस संस्थापन इतर समूहले साउन २९ गते काठमाडौंमा राष्ट्रिय भेला आयोजना गर्दैछ ।
सोही क्रममा देउवालाई त्रिभुवन अन्तर्राष्ट्रिय विमानस्थलमै स्वागत गर्ने तयारी गरिएको छ । गत भदौ २४ गते जेनजी आन्दोलनका क्रममा बुढानीलकण्ठस्थित देउवा निवासमा आगजनी तथा देउवा दम्पतीमाथि आक्रमण भएको थियो ।
त्यसपछि उपचारका लागि उनीहरू सिंगापुर गएका थिए । थप उपचार तथा फलोअपका क्रममा देउवा सिंगापुर हुँदै हङकङ पुगेका थिए ।
