काठमाडौं, २३ साउन । जनता समाजवादी पार्टी -जसपा) नेपालका अध्यक्ष उपेन्द्र यादवले मुलुक राजनीतिक अन्योल र अनिश्चिततातर्फ अघि बढिरहेको बताएका छन् ।
शनिबार काठमाडौंमा आयोजित ‘अग्रगामी मोर्चा’ घोषणा कार्यक्रममा बोल्दै यादवले संवैधानिक निकाय र मन्त्रालयहरू प्रभावकारी रूपमा सञ्चालन हुन नसकेको दाबी गरे ।
निर्णय प्रक्रिया र शक्ति केन्द्रीकरणले अधिनायकवादलाई बढावा दिइरहेको उनको आरोप थियो । यादवले जनआन्दोलन, मधेश, आदिवासी जनजाति तथा थारूलगायत आन्दोलनबाट प्राप्त संघीयता, समावेशिता, लोकतन्त्र, गणतन्त्र र धर्मनिरपेक्षताजस्ता उपलब्धि जोखिममा परेको बताए ।
ती उपलब्धिको रक्षा तथा बाँकी अधिकार प्राप्तिका लागि अग्रगामी मोर्चा गठन गरिएको उनको भनाइ थियो । सुशासनको अभाव, भ्रष्टाचार, कमजोर शान्ति–सुरक्षा र आर्थिक संकटप्रति चिन्ता व्यक्त गर्दै यादवले संविधान संशोधनमार्फत विभेद र असमानता अन्त्य गर्नुपर्नेमा जोड दिए ।
मोर्चा सत्ता परिवर्तनका लागि मात्र नभई सामाजिक न्याय, सुरक्षा र अग्रगामी परिवर्तनका लागि सक्रिय हुने उनले बताए ।
