जनकपुर, २३ साउन । जनकपुर उपमहानगरपालिका–७ जानकी नगरस्थित शबरी कुटी मन्दिरमा मधेश प्रदेश सरकारका खेलकुद तथा समाज कल्याणमन्त्री लखन दास तत्मालाई स्वागत तथा सम्मान गरिएको छ ।
शबरी सेवा समितिले आयोजना गरेको सम्मान कार्यक्रममा मन्त्री दासलाई सम्मान गर्दै समुदायको सामाजिक तथा शैक्षिक विकासमा पु¥याएको योगदानको प्रशंसा गरिएको थियो ।
कार्यक्रममा राष्ट्रिय मुसहर संघका अध्यक्ष चन्देश्वर सादाले मन्त्री दासलाई सम्मान गरेका थिए । सम्मान कार्यक्रममा बोल्दै मन्त्री दासले शबरी कुटीको भवनमा बस्दै आएका विद्यार्थीहरूको अवस्थाबारे जानकारी लिँदै उनीहरूको आवश्यकताअनुसार सहयोग गर्ने प्रतिबद्धता जनाए ।
उनले विद्यार्थीहरूका लागि केही खाट तथा बेड उपलब्ध गराउने बताएका छन् । शबरी कुटीको भवनमा मुसहर समुदायका विद्यार्थीहरू निःशुल्क रूपमा बस्दै अध्ययन गर्दै आएका छन् ।
आर्थिक रूपमा विपन्न तथा विभिन्न स्थानबाट अध्ययनका लागि जनकपुर आएका विद्यार्थीलाई आवासको सुविधा दिँदै आएको शबरी सेवा समितिले जनाएको छ ।
मन्त्री दासले शिक्षा तथा सामाजिक क्षेत्रमा पछाडि परेका समुदायका बालबालिकाको अध्ययनलाई सहज बनाउन आवश्यक सहयोग र सहकार्यलाई निरन्तरता दिने बताए ।
उनले विद्यार्थीलाई आवश्यक आधारभूत सुविधा उपलब्ध गराउनु समाज र राज्य दुवैको दायित्व भएको उल्लेख गरे । कार्यक्रममा शबरी सेवा समितिका पदाधिकारी, स्थानीयवासी तथा मुसहर समुदायका अगुवाहरूको सहभागिता रहेको थियो ।
सहभागीहरूले विद्यार्थीका लागि आवासीय सुविधा थप व्यवस्थित बनाउन प्रदेश सरकारको सहयोग आवश्यक रहेको बताएका थिए ।
