काठमाडौं, २३ साउन । राष्ट्रिय प्रजातन्त्र पार्टी -राप्रपा- का अध्यक्ष राजेन्द्र लिङ्देनले पार्टीप्रति निष्ठावान र सक्रिय कार्यकर्ताको राजनीतिक भविष्य सुरक्षित गर्ने प्रतिबद्धता जनाएका छन् ।
काठमाडौं महानगरपालिका नगर कमिटीको अधिवेशनलाई सम्बोधन गर्दै उनले अवसर नपाइने चिन्तामा विचलित नहुन कार्यकर्तालाई आग्रह गरे ।
पार्टी र देशको सेवामा समर्पित सबैलाई उचित अवसर दिने बताउँदै लिङ्देनले जिम्मेवारी लिएर काम नगर्ने र संकटका बेला पछि हट्नेहरूलाई भने पार्टीमा स्थान नदिने स्पष्ट पारे ।
अन्तरसंघर्ष वा विगतका मतभेदबाट नडराउन आग्रह गर्दै उनले आफू सबै कार्यकर्ताको अभिभावक भएर काम गर्ने बताए ।
साथै, संगठन सुदृढीकरणका लागि जारी सक्रिय सदस्यता अभियानमा केन्द्रित हुन निर्देशन दिए ।
