काठमाडौं, २३ साउन । बजारमा खाना पकाउने ग्यासको अभाव देखिएपछि उद्योगमन्त्री गौरीकुमारी यादव अनुगमनमा निस्केकी छन् ।
उपभोक्ताले खाना पकाउने ग्यास सहज रूपमा पाउन नसकेको भन्दै व्यापक गुनासो गरेपछि मन्त्री यादवले बालाजुस्थित नेपाल ग्यास उद्योगको अनुगमन गरेकी हुन् ।
पछिल्लो समय बजारमा ग्यासको अभाव देखिएसँगै सरकारको आपूर्ति व्यवस्थापनप्रति समेत आलोचना बढ्दै गएको छ । अनुगमनका क्रममा मन्त्री यादवले ग्यासको उत्पादन, भण्डारण तथा बजारमा भइरहेको आपूर्तिको अवस्थाबारे जानकारी लिएकी छन् ।
उनले उपभोक्तालाई ग्यासको सहज उपलब्धता सुनिश्चित गर्न उद्योगको क्षमता र आपूर्ति व्यवस्थापनबारे समेत चासो राखेकी छन् । मन्त्री यादवले बालाजुपछि टेकुस्थित नेपाल आयल निगमको पुरानो कार्यालयको समेत अनुगमन गरिरहेकी छन् ।
ग्यासको आपूर्ति तथा वितरणमा देखिएको समस्या पहिचान गरी तत्काल समाधानका लागि आवश्यक पहल गर्ने उद्देश्यले अनुगमन गरिएको मन्त्रीको सचिवालयले जनाएको छ ।
