काठमाडौं, २३ साउन । मधेश केन्द्रित विभिन्न राजनीतिक दलहरू एकजुट हुँदै संयुक्त राजनीतिक मोर्चा गठन गरेका छन्। जनता समाजवादी पार्टी -जसपा) नेपालसहित सात दलले संयुक्त रूपमा ‘अग्रगामी मोर्चा’ घोषणा गरेका हुन् ।
काठमाडौंको थापागाउँस्थित काठमाडौं ब्यांक्वेटमा आयोजित कार्यक्रममा सात दलका शीर्ष नेताहरूको उपस्थितिमा मोर्चाको औपचारिक घोषणा गरिएको हो ।
पछिल्लो समय मधेश तथा उत्पीडित समुदायका मुद्दालाई साझा रूपमा उठाउँदै राजनीतिक सहकार्य गर्ने उद्देश्यले मोर्चा गठन गरिएको नेताहरूले बताएका छन् ।
मोर्चामा जनता समाजवादी पार्टी -जसपा) नेपाल, जनमत पार्टी, आम जनता पार्टी, प्रगतिशील लोकतान्त्रिक पार्टी, नागरिक उन्मुक्ति पार्टी नेपाल, नेपाल सङ्घीय समाजवादी पार्टी र बहुजन एकता पार्टी नेपाल सहभागी छन् ।
मोर्चामा तत्कालीन नेकपा -माओवादी केन्द्र- का उपमहासचिवसमेत रहेका जनार्दन शर्मा तथा राष्ट्रिय स्वतन्त्र पार्टी -रास्वपा- छाडेका सन्तोष परियार आबद्ध प्रगतिशील लोकतान्त्रिक पार्टीसमेत सहभागी भएको छ ।
सात दलबीचको यो सहकार्यलाई मधेश, आदिवासी जनजाति, दलित, थारू, मुस्लिम तथा अन्य सीमान्तकृत समुदायका अधिकार र राजनीतिक प्रतिनिधित्वका विषयलाई साझा एजेन्डाका रूपमा अघि बढाउने प्रयासका रूपमा हेरिएको छ ।
मोर्चाले आगामी दिनमा संघीयता, समावेशिता, सामाजिक न्याय, सुशासन तथा राजनीतिक अधिकारका विषयमा संयुक्त रूपमा आवाज उठाउने तयारी गरेको छ ।
मधेश केन्द्रित दलहरूबीच विगतमा पटक–पटक एकता र सहकार्यका प्रयास भए पनि आन्तरिक मतभेदका कारण ती प्रयास दीर्घकालीन बन्न सकेका थिएनन् ।
यस्तो अवस्थामा सात दलको सहभागितामा गठन भएको ‘अग्रगामी मोर्चा’ले आगामी राजनीतिमा कस्तो प्रभाव पार्छ भन्ने विषयलाई चासोका साथ हेरिएको छ ।
