जनकपुर, २२ साउन । सरकार र मिटरब्याज पीडितबीच भएको ९ बुँदे सहमति तथा मन्त्रिपरिषद्को निर्णयको विरोधमा साहु-महाजनहरूले जनकपुरमा प्रदर्शन गरेका छन् ।
पीडित लेनदेन संघर्ष समितिको नेतृत्वमा मधेशका आठै जिल्लाबाट आएका साहु–महाजनहरूले नगर परिक्रमा गर्दै जिल्ला प्रहरी कार्यालय, जिल्ला प्रशासन कार्यालय र जिल्ला अदालत धनुषाअगाडि प्रदर्शन गरेका हुन् ।
उनीहरूले आफूहरूको हितविपरीत भएका निर्णय खारेज गर्न र लेनदेनसम्बन्धी समस्या समाधानका लागि त्रिपक्षीय वार्ता गर्न माग गरेका छन् ।
माग सम्बोधन नभए भदौ १ गतेदेखि काठमाडौं पुगेर सिंहदरबार घेराउ र माइतीघरमा धर्ना दिने समितिका अध्यक्ष विजय यादवले चेतावनी दिए ।
