काठमाडौं, २१ साउन । नेपाली कांग्रेसको आधिकारिकता विवादमा सर्वोच्च अदालतले यसअघिको फैसला पुनरावलोकन गर्न अनुमति दिएको छ ।
प्रधानन्यायाधीश डा. मनोजकुमार शर्मा तथा न्यायाधीश नित्यानन्द पाण्डेय र श्रीकान्त पौडेलको पूर्ण इजलासले बिहीबार पुनरावलोकनको निवेदनमाथि सुनुवाइ गर्दै अनुमति दिएको हो ।
कांग्रेसका पूर्वसभापति शेरबहादुर देउवा र पूर्वकार्यवाहक सभापति पूर्णबहादुर खड्काले वैशाख ४ गते भएको फैसलामा कानुनी त्रुटि रहेको दाबी गर्दै छुट्टाछुट्टै पुनरावलोकन निवेदन दिएका थिए ।
यसअघि सर्वोच्चले थापा नेतृत्वलाई आधिकारिकता दिने निर्वाचन आयोगको निर्णयलाई सदर गर्दै देउवाको रिट खारेज गरेको थियो ।
देउवा–खड्का पक्षले विशेष महाधिवेशनको वैधानिकता, स्थापित नजिरको उल्लंघन तथा आयोगले विगतका निर्णयसँग असंगत व्यवहार गरेको जिकिर गर्दै उक्त फैसला बदर हुनुपर्ने माग गरेका छन् ।
