जनकपुर, २० साउन। मधेश प्रदेश सरकारको खेलकुद तथा समाज कल्याण मन्त्रालयले प्रदेशमा खेलकुदको विकास, युवा प्रतिभाको प्रोत्साहन तथा खेल संस्कृतिको विस्तार गर्ने उद्देश्यका साथ विभिन्न खेलकुद सामग्री वितरण गरेको छ।
बुधबार आयोजित कार्यक्रममा खेलकुद तथा समाज कल्याण मन्त्री लखन दास तत्माले विभिन्न खेल संस्था तथा खेलाडीहरूको उपयोगका लागि खेलकुद सामग्री हस्तान्तरण गर्नुभयो।
उहाँले खेलकुदले स्वस्थ, अनुशासित, सिर्जनशील र जिम्मेवार नागरिक निर्माणमा महत्वपूर्ण भूमिका निर्वाह गर्ने भएकाले सरकारले यस क्षेत्रलाई प्राथमिकतामा राखेर काम गरिरहेको बताउनुभयो।
मन्त्री दासले प्रदेशका युवामा रहेको खेल प्रतिभालाई उजागर गर्न आवश्यक पूर्वाधार, प्रशिक्षण र खेल सामग्रीको व्यवस्थापनलाई थप प्रभावकारी बनाइने उल्लेख गर्दै आगामी दिनमा पनि यस्ता कार्यक्रमलाई निरन्तरता दिइने प्रतिबद्धता व्यक्त गर्नुभयो।
उहाँले खेलकुदमार्फत युवालाई सकारात्मक गतिविधितर्फ आकर्षित गर्दै सामाजिक विकृति न्यूनीकरणमा समेत योगदान पुग्ने विश्वास व्यक्त गर्नुभयो।
कार्यक्रममा मन्त्रालयका सचिव, मधेश प्रदेश खेलकुद विकास परिषद्का पदाधिकारी, मन्त्रालयका कर्मचारी, खेलकर्मी तथा अन्य सरोकारवालाहरूको उल्लेखनीय सहभागिता रहेको थियो।
सहभागीहरूले खेलकुद सामग्री वितरणले स्थानीय स्तरमा खेल गतिविधि विस्तार गर्न तथा नयाँ खेलाडी उत्पादन गर्न महत्वपूर्ण सहयोग पुग्ने विश्वास व्यक्त गरेका थिए।
मन्त्रालयले प्रदेशभर खेलकुदको पहुँच विस्तार, खेलाडीको क्षमता अभिवृद्धि तथा युवाको सशक्तीकरणलाई प्राथमिकतामा राख्दै आगामी दिनमा पनि यस्ता कार्यक्रमलाई निरन्तर अघि बढाउने जनाएको छ।
खेलकुदको माध्यमबाट स्वस्थ, सक्षम र अनुशासित समाज निर्माण गर्ने लक्ष्यसहित मन्त्रालयले विभिन्न योजना कार्यान्वयन गरिरहेको जनाएको छ।
