जनकपुर, २० साउन । धनुषाको जनकपुरधाम-२४, बसहियास्थित श्री गोगल प्रसाद नमुना माध्यमिक विद्यालयको ७६औँ वार्षिकोत्सव बुधबार विविध कार्यक्रमका साथ सम्पन्न भएको छ ।
कार्यक्रममा शैक्षिक उत्कृष्टता हासिल गरेका विद्यार्थीलाई सम्मान गरिनुका साथै विद्यालयको समग्र शैक्षिक विकासबारे पनि चर्चा गरिएको थियो ।
कार्यक्रमका प्रमुख अतिथि जनकपुरधाम उपमहानगरपालिकाका प्रमुख मनोज कुमार साहले शिक्षाको गुणस्तर अभिवृद्धि, अनुशासन, प्रविधिमैत्री शिक्षाका साथै नैतिक संस्कारयुक्त शिक्षामा जोड दिनुपर्ने बताएका थिए ।
उहाँले विद्यालयको विकास र शैक्षिक सुधारका लागि स्थानीय सरकार आवश्यक सहयोग गर्न सदैव प्रतिबद्ध रहेको धारणा राखे । वार्षिकोत्सवका अवसरमा विद्यालयका प्रधानाध्यापक महावीर दासले विद्यालयका उत्कृष्ट विद्यार्थीलाई सम्मान गर्नुभयो ।
यस क्रममा कक्षा १० को वार्षिक परीक्षामा १०० भन्दा बढी विद्यार्थीमध्ये प्रथम स्थान हासिल गरेका अभिषेक दासलाई मेडल तथा सम्मानपत्रसहित विशेष सम्मान प्रदान गरिएको थियो ।
विद्यालयले अभिषेक दासको उत्कृष्ट शैक्षिक उपलब्धिले अन्य विद्यार्थीलाई पनि मेहनत र उत्कृष्टता हासिल गर्न प्रेरणा मिल्ने विश्वास व्यक्त गरेको छ ।
कार्यक्रममा शिक्षक, विद्यार्थी, अभिभावक, समाजसेवी तथा विभिन्न क्षेत्रका व्यक्तित्वहरूको उल्लेखनीय सहभागिता रहेको थियो । विद्यालयले उत्कृष्ट नतिजा ल्याउने विद्यार्थीलाई सम्मान गर्ने परम्पराले अध्ययनप्रति सकारात्मक प्रतिस्पर्धा र उत्साह बढाएको सहभागीहरूले बताएका छन् ।
