काठमाडौं, २० साउन । नेपाली कांग्रेसले वर्तमान सरकारका गतिविधिले लोकतन्त्र, सुशासन र कूटनीतिक मर्यादामाथि प्रहार गरेको आरोप लगाउँदै सरकारसँग १० वटा गम्भीर प्रश्नको जवाफ मागेको छ ।
पार्टी प्रवक्ता देवराज चालिसेले पत्रकार सम्मेलनमार्फत प्रेस स्वतन्त्रता, विपक्षीमाथिको व्यवहार, भ्रष्टाचार, सुशासन, संवैधानिक निकायको स्वतन्त्रता, कूटनीतिक नियुक्ति, गृहमन्त्रीसँग जोडिएको प्रकरण तथा सुनसरी–मधेस घटनालगायत विषयमा सरकारको भूमिका प्रश्न उठाएका हुन् ।
कांग्रेसले सुनसरी र मधेसका घटनाको छानबिनका लागि उच्चस्तरीय न्यायिक आयोग गठन गर्न पनि माग गरेको छ ।
कांग्रेसले सरकारसमक्ष उठाएका मुख्य प्रश्नहरू
- प्रेस स्वतन्त्रता : प्रेस स्वतन्त्रता र अभिव्यक्ति स्वतन्त्रता किन कमजोर पारिँदैछ?
- विपक्षीमाथि व्यवहार : विपक्षी दलका नेतामाथि राज्य संयन्त्रको प्रयोग किन?
- कानुनको शासन : सरकार संविधान र कानुनभन्दा माथि हुन खोजेको हो?
- पासपोर्ट खरिद प्रकरण : पारदर्शिता किन अपनाइएन? भ्रष्टाचारको आरोपमा सरकार किन मौन?
- सम्पत्ति छानबिन : सार्वजनिक पदाधिकारीहरूको निष्पक्ष सम्पत्ति छानबिन किन नगर्ने?
- अख्तियारको स्वतन्त्रता : संवैधानिक निकायमाथि राजनीतिक दबाब किन?
- राजदूत नियुक्ति : राजदूत फिर्ता बोलाएर नयाँ नियुक्ति गर्न ढिलाइ किन?
- गृहमन्त्री प्रकरण : छानबिन प्रतिवेदन सार्वजनिक नगरी पुनः नियुक्ति किन?
- मन्त्रीहरूको अभिव्यक्ति : व्यवसायीलाई धम्की दिने शैली किन अपनाइयो?
- सुनसरी–मधेस घटना : देखावटी समिति होइन, उच्चस्तरीय न्यायिक आयोग गठन गर्न सरकार किन तयार छैन?
