काठमाडौं, १९ साउन । सुनसरी घटनामा गोली लागेर उपचाररत रहेका रबिन्द्र मेहताको निधन भएपछि नेपाल सरकारका पूर्वउपप्रधानमन्त्री राजेन्द्र महतो, पूर्वमन्त्री राजकिशोर यादव तथा महासचिव सन्तोष मेहताले त्रिभुवन विश्वविद्यालय शिक्षण अस्पताल पुगेर श्रद्धाञ्जली अर्पण गरेका छन् ।
नेताहरूले दिवंगत मेहताको पार्थिव शरीरमा श्रद्धाञ्जली अर्पण गर्दै शोकाकुल परिवारसँग भेट गरी समवेदना व्यक्त गरेका थिए । त्यसपछि उनीहरू राष्ट्रिय ट्रमा सेन्टर पुगेर सोही घटनामा घाइते भएका अमित यादव र जनकपुरका बालक आनन्द दासको स्वास्थ्य अवस्थाबारे जानकारी लिएका थिए ।
भेटका क्रममा घाइते तथा उनका परिवारले घटनाको निष्पक्ष छानबिन गरी सत्यतथ्य सार्वजनिक गर्न तत्काल उच्चस्तरीय छानबिन आयोग गठन गर्न सरकारसँग माग गरेका छन् ।
नेताहरूले निर्दोष नागरिकमाथि भएको घटनाको सत्यतथ्य छानबिन गरी दोषीमाथि कानुनबमोजिम कारबाही गर्न तथा पीडित परिवारलाई न्याय दिलाउन सरकारसँग आग्रह गरेका छन्।
साथै, दिवंगत रबिन्द्र मेहताप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्य लाभको कामना गरेका छन् ।
