काठमाडौं, १९ साउन । सत्तारुढ राष्ट्रिय स्वतन्त्र पार्टीका सांसद डा. अमेरशकुमार सिंहले मधेशमा हुने आन्दोलन तथा तनावका घटनामा सुरक्षाकर्मीले तत्काल गोली चलाउने प्रवृत्तिमाथि प्रश्न उठाएका छन् ।
मंगलबार प्रतिनिधिसभा बैठकमा बोल्दै उनले मधेश आन्दोलन, थारुहट आन्दोलन तथा साम्प्रदायिक तनावका घटनामा गोली नै पहिलो विकल्प बन्ने गरेको उल्लेख गर्दै प्रहरीले लाठी र अश्रुग्यासको प्रयोगलाई प्राथमिकता दिनुपर्ने बताए ।
उनले दंगा नियन्त्रणका लागि सुरक्षाकर्मीलाई आधुनिक तथा प्रभावकारी तालिमको व्यवस्था गर्न सरकारसँग माग गरे । सांसद सिंहले सामाजिक सद्भाव कायम राख्न सबै पक्षलाई आग्रह गर्दै अहिले समुदाय–समुदायबीच द्वन्द्व होइन, गरिबी, पछौटोपन र असमानताविरुद्ध लड्नुपर्ने आवश्यकता रहेको बताए ।
साथै भविष्यमा धार्मिक तथा साम्प्रदायिक हिंसा हुन नदिन राज्य सतर्क हुनुपर्नेमा पनि उनले जोड दिए ।
