काठमाडौं, १९ साउन । आमरण अनशनरत नर्स ज्योति रानाभाटको समर्थनमा मंगलबार वीर अस्पतालका नर्सहरूले धर्ना दिएका छन् ।
उनीहरूले उचित तलब, सुरक्षित कार्य वातावरण, बिरामीको सुरक्षा र नर्सिङ पेशाको सम्मान सुनिश्चित गर्न माग गर्दै शान्तिपूर्ण प्रदर्शन गरेका हुन् ।
साउन १४ गतेदेखि १५ बुँदे मागसहित अनशनमा बसेकी रानाभाटको स्वास्थ्य अवस्था बिग्रिएपछि उनलाई वीर अस्पतालमा भर्ना गरिएको छ ।
सरकारसँग भएको छलफलमा कार्यदल गठनको प्रस्ताव आए पनि मागको ठोस सम्बोधन नभएको भन्दै उनले अस्वीकार गरेकी छन् ।
रानाभाटले न्यूनतम पारिश्रमिकको कानुनी सुनिश्चितता, नर्सिङ सेवा ऐन, पर्याप्त दरबन्दी, करार प्रथाको अन्त्य, जोखिम भत्ता तथा सुरक्षित र सम्मानजनक कार्य वातावरणको माग राखेकी छन् । उनको आन्दोलनमा देशभरका नर्सहरूको समर्थन बढ्दै गएको छ ।
