काठमाडौं, १९ साउन । सङ्घीय संसद् प्रतिनिधिसभाको बैठक आज दिउँसो १ बजे बस्दैछ ।
बैठकमा प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले आदिवासी जनजाति आयोगको छैटौँ वार्षिक प्रतिवेदन -आव २०८१/८२- पेश गर्ने कार्यसूची रहेको छ ।
बैठकमा नेपाली कांग्रेसका संसदीय दलका नेता भीष्मराज आङ्देम्बेद्वारा प्रस्तुत भूमिहीन, सुकुमवासी र अव्यवस्थित बसोबासीको पहिचान, पुनःस्थापना तथा लालपूर्जा वितरण सम्बन्धी जरुरी सार्वजनिक महत्वको प्रस्तावमाथि छलफल हुनेछ ।
यस्तै, आज अर्थ, अन्तरराष्ट्रिय सम्बन्ध तथा पर्यटन, उद्योग तथा वाणिज्य र श्रम तथा उपभोक्ता हित, राज्य व्यवस्था तथा सुशासन तथा सार्वजनिक नीति तथा प्रत्यायोजित विधायन समितिसहित पाँच संसदीय समितिको बैठक पनि बस्दैछ ।
ती बैठकमा नेपाल राष्ट्र बैंक ऐन संशोधन विधेयक, पर्यटन विधेयक, खाना पकाउने ग्यास आपूर्ति व्यवस्थापन तथा नेपाल विशेष सेवा ऐन संशोधनलगायत विषयमा छलफल हुने कार्यसूची छ ।
