मनसुन सक्रियः मधेससहित अधिकांश क्षेत्रमा वर्षा, सतर्क रहन आग्रह

काठमाडौं, १७ साउन । देशभर मनसुनी वायुको प्रभाव कायम रहेकाले आज आइतबार अधिकांश क्षेत्रमा वर्षाको सम्भावना रहेको जल तथा मौसम विज्ञान विभागले जनाएको छ ।

मौसम पूर्वानुमान महाशाखाका अनुसार देशभर सामान्यदेखि पूर्ण बदली रहनेछ । पहाडी भूभागका धेरै स्थान तथा तराईका केही स्थानमा मध्यम वर्षा हुने सम्भावना छ भने कोसी, बागमती, गण्डकी, लुम्बिनी र कर्णाली प्रदेशका केही स्थानमा भारी वर्षा हुन सक्ने पूर्वानुमान गरिएको छ ।

रातिको समयमा वर्षा थप बढ्ने सम्भावना रहेको महाशाखाले जनाएको छ। कोसी, बागमती, गण्डकी, मधेस तथा लुम्बिनी प्रदेशका केही स्थानमा भारीदेखि धेरै भारी वर्षा हुन सक्ने भएकाले सतर्कता अपनाउन आग्रह गरिएको छ ।

मौसमविद् डेभिड ढकालका अनुसार काठमाडौं उपत्यकामा पनि दिउँसोदेखि वर्षा बढ्ने र राति मध्यमदेखि कतै–कतै भारी वर्षा हुन सक्ने सम्भावना रहेको छ ।