जनकपुरधाम, १६ साउन । तराई मधेशका विभिन्न जिल्लामा पछिल्ला दिनदेखि देखिएको तनावपूर्ण अवस्था साम्य पार्ने प्रयासस्वरूप गृहमन्त्री सुधन गुरुङले शनिबार जनकपुरधाममा आन्दोलनरत पक्षसँग औपचारिक वार्ता सुरु गरेका छन् ।
गृहमन्त्री गुरुङले हिन्दु सम्राट सेनासहित आन्दोलनरत विभिन्न समूहका प्रतिनिधिहरूसँग छलफल गर्दै वर्तमान अवस्था, आन्दोलनका माग तथा शान्ति स्थापनाका उपायबारे संवाद अघि बढाएका हुन् ।
सरकारले वार्तामार्फत समस्या समाधान गर्दै सामाजिक सद्भाव कायम गर्ने उद्देश्य राखेको जनाएको छ । साउन १० गते सुनसरीको कप्तानगञ्जमा दुई समुदायबीच भएको झडपमा दुई युवाको मृत्यु भएपछि तराई मधेशका विभिन्न जिल्लामा आन्दोलन र प्रदर्शन चर्किएको थियो ।
त्यसपछि सिरहामा पनि समुदायबीचको विवादका क्रममा प्रहरीले चलाएको गोली लागेर एक युवकको ज्यान गएपछि आन्दोलन थप उग्र बनेको थियो ।
बढ्दो तनावलाई मध्यनजर गर्दै गृहमन्त्री गुरुङ अहिले तराई–मधेशका जिल्लाको भ्रमणमा छन् । यसअघि विभिन्न जिल्लामा प्रशासनले सर्वदलीय तथा सर्वपक्षीय सद्भाव ¥यालीसमेत आयोजना गरेको थियो । प्रशासनले केही जिल्लाबाट कफ्र्यु हटाएर निषेधाज्ञा लागू गरे पनि संवेदनशील क्षेत्रमा सुरक्षा सतर्कता कायमै राखिएको छ ।
