काठमाडौं, १६ साउन । नेपाली कांग्रेसको संस्थापन इतर समूहले आगामी राष्ट्रिय भेलाको तयारीलाई औपचारिक रूपमा अघि बढाउँदै ५ सय ५१ सदस्यीय मूल आयोजक समिति गठन गरेको छ ।
शनिबार आयोजित पत्रकार सम्मेलनमार्फत डा. शशांक कोइरालाको नेतृत्वमा मूल आयोजक समिति गठन गरिएको जानकारी दिइएको हो ।
भेलाको व्यवस्थापन र सञ्चालनलाई प्रभावकारी बनाउन मूल आयोजक समितिसँगै विभिन्न जिम्मेवारी बाँडफाँट गरी १६ वटा उपसमिति समेत गठन गरिएको प्रचार–प्रसार समितिका संयोजक मीन विश्वकर्माले बताए ।
यसअघि नै इतर समूहले काठमाडौंमा साउन २९ देखि ३१ गतेसम्म राष्ट्रिय भेला आयोजना गर्ने घोषणा गरिसकेको थियो। सोही कार्यक्रमलाई सफल बनाउन आवश्यक तयारीका लागि आयोजक समिति तथा उपसमितिहरू गठन गरिएको जनाइएको छ ।
नेतृत्व चयनदेखि कार्यक्रम व्यवस्थापनसम्मका विभिन्न पक्षलाई व्यवस्थित बनाउन समिति गठन गरिएको र राष्ट्रिय भेलाको तयारी तीव्र गतिमा अघि बढाइएको इतर समूहले जनाएको छ ।
