काठमाडौं, १६ साउन । नेपाल आयल निगमले बजारमा खाना पकाउने एलपी ग्यासको अभाव नरहेको स्पष्ट पार्दै उपभोक्ताले ग्यास नपाए तत्काल निगमको हटलाइन नम्बर ०१–५९७१९०२ मा सम्पर्क गर्न आग्रह गरेको छ ।
बजारमा ग्यास अभाव भएको गुनासो बढ्न थालेपछि निगमले शनिबार विज्ञप्ति जारी गर्दै आयात तथा बिक्री वितरण नियमित रूपमा भइरहेको जनाएको हो ।
कुनै पनि क्षेत्रमा कृत्रिम अभाव सिर्जना गरी उपभोक्तालाई सास्ती दिइएको पाइएमा तत्काल जानकारी गराउन निगमले अनुरोध गरेको छ । काठमाडौं उपत्यकामा ग्यासको माग र आपूर्तिलाई सहज बनाउन टेकुस्थित निगम कार्यालयबाट बिहान ११ बजेदेखि बेलुका ५ बजेसम्म विभिन्न ग्यास उद्योगमार्फत प्रत्यक्ष बिक्री–वितरणको व्यवस्था मिलाइएको निगमले जनाएको छ ।
टेकु कार्यालयबाट नेपाल ग्यास, एचपी ग्यास, एभरेस्ट ग्यास, सुगम ग्यास र श्रीराम ग्यास उपलब्ध हुने व्यवस्था गरिएको छ । निगमले उपभोक्तालाई अनावश्यक रूपमा ग्यास भण्डारण नगर्न र आवश्यकताअनुसार मात्र खरिद गर्न पनि आग्रह गरेको छ ।
निगमले बजारमा कृत्रिम अभाव सिर्जना गर्ने वा कालोबजारी गर्नेविरुद्ध आवश्यक कारबाही गरिने चेतावनीसमेत दिएको छ ।
