काठमाडौं, १५ साउन । राष्ट्रपति रामचन्द्र पौडेलले देशको पछिल्लो शान्ति–सुरक्षा अवस्था र सामाजिक सद्भावबारे प्रथम राष्ट्रपति डा. रामवरण यादव तथा प्रथम उपराष्ट्रपति परमानन्द झासँग परामर्श गरेका छन् ।
शुक्रबार शीतल निवासमा भएको भेटवार्तामा सुनसरीको देवानगञ्ज घटनापछि तराई–मधेशका विभिन्न जिल्लामा विकसित परिस्थितिबारे छलफल भएको राष्ट्रपति कार्यालयले जनाएको छ ।
भेटका क्रममा सहभागीहरूले नेपालमा लामो समयदेखि कायम रहेको धार्मिक सहिष्णुता, सामाजिक सद्भाव, जातीय एकता र आपसी भाइचारालाई जोगाउन सबै पक्षले जिम्मेवार भूमिका निर्वाह गर्नुपर्नेमा जोड दिएका थिए ।
प्रथम राष्ट्रपति डा. रामवरण यादवले वर्तमान परिस्थितिलाई संवेदनशील रूपमा व्यवस्थापन गर्न सरकारले राजनीतिक दल, नागरिक समाज, धार्मिक अगुवा र सर्वसाधारणसँग समन्वय गर्दै अघि बढ्नुपर्ने धारणा व्यक्त गरेका थिए ।
उनले राष्ट्रिय एकता र सामाजिक सद्भाव कायम राख्दै समस्या समाधानतर्फ सरकार प्रभावकारी रूपमा अघि बढ्नुपर्ने सुझाव पनि दिएका छन् ।
