काठमाडौं, १४ साउन । प्रधानमन्त्री बालेन्द्र शाहले सुनसरीको देवानगञ्ज, सिरहालगायत स्थानमा भएका घटनाप्रति दुःख व्यक्त गर्दै सरकारले शान्ति-सुरक्षा कायम गर्न आवश्यक सबै कदम चालेको बताएका छन् ।
बिहीबार राष्ट्रका नाममा सम्बोधन गर्दै प्रधानमन्त्री शाहले घटनामा ज्यान गुमाएका जयप्रकाश मेहता, ओमप्रकाश मेहता र गणेश यादवप्रति श्रद्धाञ्जलि व्यक्त गर्दै शोकसन्तप्त परिवारप्रति समवेदना प्रकट गरे।
घाइतेहरूको उपचारमा कुनै कमी हुन नदिने र घटनाको निष्पक्ष छानबिन गरी दोषीमाथि कानुनी कारबाही गरिने प्रतिबद्धता उनले जनाए ।
प्रधानमन्त्रीले सर्वदलीय बैठक, स्थानीय तहमा संवाद, गृहमन्त्रीको घटनास्थल भ्रमण तथा राष्ट्रिय सुरक्षा परिषद्को बैठकमार्फत शान्ति स्थापनाका प्रयास जारी रहेको जानकारी दिए ।
सामाजिक सञ्जालमा अफवाह र घृणा फैलाउने गतिविधिबाट टाढा रहन तथा आधिकारिक सूचनामात्र विश्वास गर्न उनले आग्रह गरे ।
उनले कुनै एक घटनाका आधारमा सम्पूर्ण समुदायलाई दोषी ठहर गर्नु अनुचित हुने उल्लेख गर्दै धार्मिक सहिष्णुता, सामाजिक सद्भाव र राष्ट्रिय एकता कायम राख्न सबै पक्षसँग संयम अपनाउन अपिल गरे ।
