सिरहा, १४ साउन । सिरहामा बिहीबार भएको झडपका क्रममा गोली लागेर गम्भीर घाइते भएका एक किशोरको मृत्यु भएको छ ।
घटनापछि जिल्लाको सुरक्षा अवस्था थप तनावपूर्ण बनेको छ भने प्रशासनले विभिन्न क्षेत्रमा कफ्र्यु आदेश जारी गरेको छ । जिल्ला प्रशासन कार्यालयका सहायक प्रमुख जिल्ला अधिकारी चेतराज बरालका अनुसार औरही गाउँपालिका–२ का अन्दाजी १५ वर्षीय गणेश यादवको मृत्यु भएको जानकारी प्राप्त भएको छ ।
उनी झडपका क्रममा गोली लागेर गम्भीर घाइते भएका थिए । मृत्यु भएको भन्ने खबर आएको छ । औरही गाउँपालिका–२ का गणेश यादवको निधन भएको जानकारी हामीले पाएका छौं, सहायक प्रमुख जिल्ला अधिकारी बरालले भने ।
उनका अनुसार घटनाबारे थप विवरण संकलन भइरहेको छ । घटनापछि सम्भावित अप्रिय अवस्था नियन्त्रणमा लिन प्रभावित क्षेत्रमा नेपाल प्रहरी, सशस्त्र प्रहरी र अन्य सुरक्षा निकायको बाक्लो परिचालन गरिएको छ ।
सुरक्षा संवेदनशीलता बढेपछि जिल्ला प्रशासन कार्यालयले सिरहाका विभिन्न क्षेत्रमा अर्को सूचना जारी नभएसम्मका लागि कफ्र्यु आदेश लागू गरेको छ ।
