जनकपुर, १४ साउन । दुई समुदायबीचको तनाव बढ्दै गएपछि जनकपुरस्थित सहरी क्षेत्रमा जिल्ला प्रशासन कार्यालयले कफ्र्यु आदेश जारी गरेको छ ।
प्रमुख जिल्ला अधिकारी प्रेमप्रसाद लुइँटेलका अनुसार बिहीबार दिउँसो ३:३० बजेदेखि अर्को सूचना जारी नभएसम्मका लागि कफ्र्यु लागू गरिएको हो ।
सुनसरीको कप्तानगञ्जमा भएको गोलीकाण्डको विरोधमा जनकपुरमा बिहानदेखि प्रदर्शन, नाराबाजी र टायर दहन भएपछि सुरक्षा अवस्था थप संवेदनशील बनेको थियो ।
विभिन्न स्थानमा प्रदर्शनकारी र सुरक्षाकर्मीबीच झडपसमेत भएको तथा तनाव बढ्दै गएपछि जिल्ला प्रशासनले कफ्र्यु आदेश जारी गर्ने निर्णय गरेको जनाएको छ ।
प्रशासनका अनुसार कफ्र्यु अवधिमा तोकिएको क्षेत्रमा सर्वसाधारणको आवतजावत, भेला, जुलुस तथा प्रदर्शन गर्न निषेध गरिएको छ । शान्ति–सुरक्षा कायम राख्न नेपाल प्रहरी, सशस्त्र प्रहरी र अन्य सुरक्षा निकायलाई उच्च सतर्कतामा राखिएको छ ।
