जनकपुर, १४ साउन । सुनसरीको कप्तानगञ्जमा भएको गोलीकाण्डको विरोधमा जनकपुरमा बिहीबार बिहानदेखि प्रदर्शन चर्किएको छ ।
प्रदर्शनकारीहरूले विभिन्न मुख्य चोकमा टायर बालेर नाराबाजी गर्दै बजार बन्द गराएका छन् । प्रदर्शनका कारण जनकपुरको जनजीवन आंशिक रूपमा प्रभावित बनेको छ ।
बिहानैदेखि रामानन्द चौक, पीडारी चोक, भानुचोक, शिवचोक,बजरंग चौक,जिरोमाईललगायतका स्थानमा प्रदर्शनकारीहरू भेला भई टायर दहन गरेका छन् ।
उनीहरूले सुनसरी घटनाको निष्पक्ष छानबिन, दोषीमाथि कारबाही तथा पीडितलाई न्यायको माग गर्दै नाराबाजी गरेका छन् । प्रदर्शनका कारण अधिकांश पसल तथा व्यवसाय बन्द भएका छन् भने सवारी आवागमन पनि प्रभावित भएको छ ।
जनकपुरधाम तथा आसपासका विभिन्न स्थानबाट बजार क्षेत्रमा पुगेका प्रदर्शनकारीलाई नियन्त्रणमा लिन ठूलो संख्यामा नेपाल प्रहरी र सशस्त्र प्रहरी परिचालन गरिएको छ ।
केही स्थानमा प्रदर्शनकारी र प्रहरीबीच धकेलाधकेल तथा झडप भएको छ । झडपका क्रममा प्रदर्शनकारीहरूले ढुंगामुढा गरेका छन् भने प्रहरीले स्थिति नियन्त्रणमा लिन प्रयास गरिरहेको छ ।
जिल्ला प्रशासन र सुरक्षा निकायले अवस्था थप तनावपूर्ण हुन नदिन सुरक्षा व्यवस्था कडा बनाएका छन् ।
