राजविराज, १३ साउन । सुनसरीको देवानगञ्ज–३ कप्तानगञ्जमा प्रहरीको गोली लागेर एक युवकको मृत्यु भएको घटनाको विरोधमा सप्तरीका विभिन्न स्थानमा प्रदर्शन र बन्द गरिएको छ ।
राजविराज र हनुमाननगर बजार बन्द गरिएका छन् भने तिरहुत–४ डिमनमा हुलाकी सडक अवरुद्ध पारेर प्रदर्शन भइरहेको छ । यसअघि कञ्चनरूप–११ सिमरा चोकमा टायर बालेर पूर्व–पश्चिम राजमार्गमा केहीबेर चक्काजाम गरिएको थियो ।
प्रदर्शनकारीले घटनाको निष्पक्ष छानबिन, पीडितलाई क्षतिपूर्ति, निःशुल्क उपचारको व्यवस्था तथा दोषीमाथि कारबाहीको माग गरेका छन् ।
यता, देवानगञ्जमा जारी कफ्र्युका कारण पूर्वबाट हुने ढुवानी प्रभावित हुँदा सप्तरीमा एलपी ग्यास आपूर्तिसमेत प्रभावित भएको व्यवसायीले बताएका छन् ।
