काठमाडौं, १३ साउन । रास्वपा सभापति रवि लामिछानेको आह्वानमा बसेको सर्वदलीय बैठकले सुनसरीलगायतका क्षेत्रमा देखिएको तनावलाई मध्यनजर गर्दै सामाजिक सद्भाव, शान्ति र संयम कायम राख्न सबै राजनीतिक दलको तर्फबाट संयुक्त विज्ञप्ति जारी गर्ने निर्णय गरेको छ ।
बैठकपछि कांग्रेस संसदीय दलका नेता भीष्मराज आङ्देम्बेले प्रधानमन्त्री र गृहमन्त्रीको अनुपस्थितिप्रति नेताहरूले चासो व्यक्त गर्दै सरकारलाई जिम्मेवार र सक्रिय भूमिका निर्वाह गर्न आग्रह गरेको बताए।
उनले प्रधानमन्त्रीले राष्ट्रपतिसँग समेत छलफल गरी राष्ट्रिय सहमतिको पहल गर्नुपर्ने धारणा राखे । नेकपा एमालेका महासचिव शंकर पोखरेलले बैठकमा सुनसरीलगायतका क्षेत्रमा देखिएको तनाव सामान्य बनाउन तथा भीड नियन्त्रणमा सरकार किन प्रभावकारी हुन नसकेको भन्ने विषयमा पनि छलफल भएको जानकारी दिए ।
