सुनसरी, १३ साउन । देवानगञ्ज–कप्तानगञ्जमा दुई समूहबीच भएको हिंसात्मक झडप, ढुंगामुढा र आगजनीपछि सुनसरी प्रशासनले लगाएको अनिश्चितकालीन कफ्र्युका कारण बुधबार बिहान घटनास्थल, कोसी राजमार्ग र बजार क्षेत्र सुनसान बनेका छन् ।
जिल्ला प्रशासन कार्यालयले स्थानीय प्रशासन ऐन, २०२८ अनुसार अर्को आदेश नभएसम्म तोकिएका क्षेत्रमा आवतजावत, भेला, जुलुस, प्रदर्शन तथा सभा–समारोहमा पूर्ण प्रतिबन्ध लगाएको जनाएको छ ।
कफ्र्यु इटहरी, रामधुनी तथा इनरुवा, दुहबी, भोक्राहा नरसिंह, कोसी, गढी, देवानगञ्ज, हरिनगर र बर्जु गाउँपालिकाका तोकिएका क्षेत्रमा लागू गरिएको छ ।
प्रहरीले सामाजिक सञ्जालमा फैलाइएका धारिलो हतियार प्रहारसम्बन्धी भ्रामक तस्बिर र अफवाहको पछि नलाग्न आग्रह गर्दै सुरक्षा व्यवस्था कडा पारिएको जनाएको छ ।
