जनकपुर, १२ साउन । मधेश प्रदेश सरकारको खेलकुद तथा समाज कल्याण मन्त्रालयले मन्त्रालय परिसर र वरिपरिलाई स्वच्छ र व्यवस्थित बनाउने अभियानअन्तर्गत सरसफाइ अभियान सञ्चालन गरेको छ ।
मन्त्रालयका कर्मचारीहरू मंगलवार मन्त्रालय अगाडिको फोहोर संकलन तथा सरसफाइमा सक्रिय रूपमा सहभागी भएका हुन् । मन्त्रालयका एक कर्मचारीका अनुसार कार्यालय परिसर र वरिपरिलाई पूर्ण रूपमा सफा गरी हरियालीयुक्त तथा आकर्षक बगैँचाको रूपमा विकास गर्ने योजना रहेको छ । 
नियमित सरसफाइसँगै वातावरण संरक्षण र कार्यालय परिसरलाई व्यवस्थित बनाउने उद्देश्यले अभियान सञ्चालन गरिएको उनले बताए । उक्त सरसफाइ अभियान खेलकुद तथा समाज कल्याण मन्त्री लखन दास तत्माको निर्देशनमा सञ्चालन गरिएको मन्त्रालयले जनाएको छ ।
मन्त्री दासले सार्वजनिक कार्यालयहरू स्वच्छ र सफा हुनुपर्नेमा जोड दिँदै कर्मचारीहरूलाई सरसफाइमा सक्रिय सहभागिता जनाउन आग्रह गरेका थिए ।
मन्त्री दासले मधेश भवन परिसरका सबै मन्त्रालय र मन्त्री निवास वरपर पनि यस्तै प्रकारका सरसफाइ अभियान सञ्चालन गर्न सके सम्पूर्ण सरकारी परिसर सफा, व्यवस्थित र वातावरणमैत्री बन्ने विश्वास व्यक्त गरे ।
उनले स्वच्छ वातावरणले सेवाग्राहीमा पनि सकारात्मक सन्देश जाने उल्लेख गर्दै सरसफाइलाई नियमित अभियानका रूपमा अघि बढाइने बताए ।
