काठमाडौं, १२ साउन । सुनसरीको देवानगन्ज क्षेत्रको अवस्था बिस्तारै सामान्य बन्दै गए पनि इनरुवादेखि कोसी ब्यारेजसम्म पूर्व–पश्चिम राजमार्ग क्षेत्रमा प्रदर्शन चर्किँदा यातायात सेवा प्रभावित भएको छ ।
प्रदर्शनकारीहरूले विभिन्न स्थानमा टायर बालेर सडक अवरोध गरेपछि सुरक्षा सतर्कताका लागि इटहरीबाट पश्चिमतर्फ जाने सवारीसाधन रोकिएको प्रहरीले जनाएको छ ।
आइतबार राति देवानगन्जमा दुई समूहबीच भएको झडप नियन्त्रणका क्रममा प्रहरीले चलाएको गोली लागेर २४ वर्षीय ओमप्रकाश मेहताको मृत्यु भएको थियो भने २२ जना घाइते भएका छन् ।
घटनाको विरोधमा प्रदर्शन सुनसरीबाट विराटनगरसम्म फैलिएको छ भने विराटनगरका मुख्य बजारका पसलहरू पनि बन्द गराइएको छ ।
