काठमाडौं, ११ साउन । सुनसरीको देवानगञ्ज–३ कप्तानगञ्जमा प्रहरीको गोली लागेर एक युवाको मृत्यु भएपछि सरकारले सुरक्षा निकायमा व्यापक फेरबदल गरेको छ ।
गृह मन्त्रालयले कोसी प्रदेश प्रहरी प्रमुख डीआईजी विनोद घिमिरेलाई फिर्ता बोलाएर उनको स्थानमा डीआईजी शेखर खनाललाई खटाएको छ ।
यस्तै, सुनसरीका प्रमुख जिल्ला अधिकारी बासुदेव घिमिरे, प्रहरी प्रमुख एसपी केशव थेबे तथा सशस्त्र प्रहरीका डीएसपी नन्दकिशोर महतोलाई पनि फिर्ता बोलाइएको छ ।
उनीहरूको स्थानमा क्रमशः इश्वरीप्रसाद अर्याल, पुष्पराज मल्ल र डीएसपी मदन नाथलाई जिम्मेवारी दिइएको छ । आइतबार राति भएको झडपमा प्रहरीको गोली लागेर एक जनाको मृत्यु तथा २४ जना घाइते भएपछि सरकारले सहसचिव भूपेन्द्र थापाको संयोजकत्वमा पाँच सदस्यीय छानबिन समिति गठन गरेको छ ।
देवानगञ्ज र हरिनगर गाउँपालिकाका पाँच क्षेत्रमा अनिश्चितकालीन कफ्र्यु जारी गरिएको छ भने सुरक्षा व्यवस्थाका लागि नेपाली सेनासमेत परिचालन गरिएको छ ।
