विराटनगर, ११ साउन । सुनसरीको देवानगञ्ज गाउँपालिका–३ कप्तानगञ्जमा कफ्र्यु आदेश उल्लङ्घन गर्दै प्रदर्शन उग्र बनेपछि नेपाली सेना परिचालन गरिएको छ ।
आइतबार राति दुई समूहबीच भएको झडपमा गोली लागेर एक २४ वर्षीय युवकको मृत्यु तथा नौ जना घाइते भएपछि जिल्ला प्रशासन कार्यालय सुनसरीले सोमबार बिहानदेखि अनिश्चितकालीन कफ्र्यु जारी गरेको थियो । तर कफ्र्युका बाबजुद प्रदर्शनकारी सडकमा उत्रिएर टायर बाल्ने, आगजनी, तोडफोड तथा पूर्व–पश्चिम राजमार्ग अवरुद्ध गरेपछि अवस्था तनावग्रस्त बनेको हो ।
नेपाल प्रहरी र सशस्त्र प्रहरीले स्थिति नियन्त्रणमा लिन नसकेपछि बख्तरबन्द गाडीसहित नेपाली सेना परिचालन गरिएको प्रमुख जिल्ला अधिकारी वासुदेव घिमिरेले जानकारी दिएका छन् ।
हाल क्षेत्रमा सुरक्षा व्यवस्था कडा पार्दै अवस्था नियन्त्रणमा लिने प्रयास भइरहेको छ ।
