विराटनगर, ११ साउन । सुनसरीको देवानगञ्ज गाउँपालिका–३ कप्तानगन्जमा दुई समूहबीच भएको हिंसात्मक झडप नियन्त्रण गर्न सशस्त्र प्रहरीले चलाएको गोली लागेर स्थानीय ओमप्रकाश मेहताको मृत्यु भएको छ ।
गोली लागेर गम्भीर घाइते भएका मेहतालाई उपचारका लागि विराटनगरस्थित न्युरो अस्पताल लगिए पनि चिकित्सकले मृत घोषणा गरेका हुन् ।
घटनामा प्रहरी र प्रदर्शनकारीसहित १६ भन्दा बढी व्यक्ति घाइते भएका छन् भने गोली लागेर ८ सर्वसाधारण घाइते भएका छन् । प्रहरीका अनुसार कोशी अस्पताल र विराट नर्सिङ होममा घाइतेहरूको उपचार भइरहेको छ ।
झडपमा प्रहरी निरीक्षक राकेश राईसहित ८ जना सुरक्षाकर्मी पनि घाइते भएका छन् । विवाद हिंसात्मक बनेपछि अवस्था नियन्त्रणमा लिन सशस्त्र प्रहरीले गोली चलाएको प्रहरीले जनाएको छ ।
