काठमाडौं, ९ साउन । काठमाडौंको तारकेश्वर नगरपालिका–१ स्थित कालेबासे चुनीदेवी बालुवा प्रशोधन केन्द्र नजिक पार्किङ गरिएको विद्युतीय कारभित्र ४५ वर्षीया रश्मी रिजाल जलेको अवस्थामा मृत फेला परेकी छन् ।
तारकेश्वर–९ निवासी रिजाल नक्सालस्थित सानिमा क्यापिटल लिमिटेडमा मर्चेन्ट हेडका रूपमा कार्यरत थिइन् । उनी साउन ८ गते बिहानदेखि सम्पर्कविहीन रहेको पारिवारिक स्रोतले जनाएको छ ।
शनिबार दिउँसो कारको पछाडिको सिटमा उनको शव फेला परेपछि जिल्ला प्रहरी परिसर काठमाडौं र प्रहरी वृत्त बालाजुले घटनास्थलमा पुगेर अनुसन्धान सुरु गरेका छन् ।
शव पोस्टमार्टमका लागि शिक्षण अस्पताल महाराजगञ्ज पठाइएको छ भने घटनाको कारणबारे प्रहरीले गहन अनुसन्धान गरिरहेको जनाएको छ ।
